काठमाडौं । बंगलादेशमा हुने इन्टरनेसनल थिएटर फेस्टिभल (अन्तर्राष्ट्रिय नाटक महोत्सव) मा नेपाली नाटक ‘नौगेडी’ मञ्चन हुने भएको छ । भूमिज थिएटरको आयोजनामा अक्टोबर ९ देखि १६ सम्म बंगलादेशको पञ्चगढमा हुने नाटक महोत्सवमा नेपाली नाटक ‘नौगेडी’ पनि छानिएको हो ।
नेपाली नाटकको प्रतिनिधित्व गर्दै आदिइत्यादिको प्रस्तुतिमा ‘नौगेडी’ मञ्चन हुनेछ । आदिइत्यादिका अन्तर्राष्ट्रिय संयोजक एवम् त्रिभुवन विश्वविद्यालयका सहप्राध्यापक डा. अशोक थापाका अनुसार असोज २६ नाटक मञ्चन हुने छ ।
नाटकको लेखन तथा निर्देशशन पुरु लम्सालले गरेका छन् । उनका अनुसार नाटक मञ्चनका लागि सबै तयारी पूरा भएको छ । आयोजकले जनाए अनुसार महोत्सवमा नेपालसंगै भारत, बंगलादेश लगायत विभिन्न देशका नाटक मञ्चन हुनेछन् ।
गत फागुनमा कोलकातामा आयोजित महोत्सवमा आदिइत्यादि र मञ्जरी नाट्य समूह लमजुङले पुरु लम्सालकै लेखन तथा निर्देशनमा बनेको नाटक ‘पानीघट्ट’ मञ्चन गरेका थिए ।
निर्देशक लम्सालका अनुसार ‘नौगेडी’ नुवाकोटको प्रसिद्ध दुप्चेश्वर जात्रा र घ्याङफेदीको परिवेशमा तयार पारिएको नाटक हो । यसमा विद्यमान छुवाछुत र चेलीबेटी बेचबिखनको समस्यालाई उजागर गर्न खोजिएको उनले बताए । नौगेडीमा सुशीलसिंह ठकुरी, पवित्रा खड्का, रीता थापा, आईपी आचार्य, अनन्तप्रकाश श्रेष्ठ, बिमला अधिकारी देवकोटा, निर्मला खड्का, जेबी डिसी, केदार बोहोरा, जयराम तिमल्सिना, मन्जु गिरी लगायतले अभिनय गरेका छन् ।